کھا کے تیغ نگہ یار دل زار گرا

کھا کے تیغ نگہ یار دل زار گرا

مردم دید پکارے کہ وہ سردار گرا

وائے رسوائی دل عام ہوئی عشق کی بو

شیشۂ مشک بغل سے سر بازار گرا

نہ اٹھا خاک مذلت سے کبھی مثل سرشک

جو نظر سے ترے اے شوخ جفا کار گرا

قدم اندازہ سے باہر نہ کبھی رکھ اے دل

جو چلا دوڑ کے آخر دم رفتار گرا

ناتوانی نے بتایا ہے نمازی مجھ کو

میں کئی بار اٹھا اور کئی بار گرا

عشوہ و غمزہ و انداز و ادا ہیں قاتل

کشور دل پہ مرے لشکر جرار گرا