مصیبت میں بھی غیرت آشنا خاموش رہتی ہے

مصیبت میں بھی غیرت آشنا خاموش رہتی ہے

کہ درویشوں کی حاجت تو سدا خاموش رہتی ہے

خوشی کا جشن ہو یا ماتم مرگ تمنا ہو

یہاں ہر حال میں خلق خدا خاموش رہتی ہے

شجر کو وجد آتا ہے نہ تو شاخیں لچکتی ہیں

بہاروں میں بھی اب باد صبا خاموش رہتی ہے

مری چشم طلب میں خواب کا ہنگامہ خیمہ زن

مگر تعبیر مثل کج ادا خاموش رہتی ہے

درون خانۂ دل روز و شب محشر بپا لیکن

زباں اپنی برائے تجربہ خاموش رہتی ہے

چمک اٹھتے ہیں جب چہرے تب و تاب تمنا سے

تو پھر شائستگیٔ آئینہ خاموش رہتی ہے

مرے چاروں طرف عکس طلسم سامری روشن

خموشی چیختی ہے اور صدا خاموش رہتی ہے

لرز جاتی ہیں پلکیں اشک جم جاتے ہیں آنکھوں میں

جب اپنی خواہش بے ساختہ خاموش رہتی ہے

درختوں کی بغاوت ہے کہ یہ موسم کی بے رحمی

کہ جنگل آہ بھرتا ہے ہوا خاموش رہتی ہے