وہ روشنی کہ بقید سحر نہیں اے دوست

وہ روشنی کہ بقید سحر نہیں اے دوست

ترا جمال ہے میری نظر نہیں اے دوست

ترے بغیر وہ شام و سحر نہیں اے دوست

کوئی چراغ سر رہ گزر نہیں اے دوست

بہانا ڈھونڈھ لیا تجھ سے بات کرنے کا

کچھ اور مقصد عرض ہنر نہیں اے دوست

شب فراق یہ محویتوں کا عالم ہے

کسی کی ہائے کسی کو خبر نہیں اے دوست

مہ و نجوم بھی گرم سفر تو ہیں لیکن

کوئی بھی ان میں مرا ہم سفر نہیں اے دوست

کبھی ادھر سے جو گزرے تو سرسری گزرے

سواد طور تری رہ گزر نہیں اے دوست