Ghurub Hote Hue Surajon Ke Pas Rahe

ghurub hote hue surajon ke pas rahe

udas sham ki manind hum udas rahe

khanDar sa ek makan takta hai raston ko

na jaane aaj kahan is ke gham shanas rahe

bahaar aai to saj-dhaj ke ho gae tayyar

daraKHt sirf KHizaon mein be-libas rahe

ye kah ke ho gae thoDe se bewafa hum bhi

hamesha kaun mohabbat mein dewdas rahe

mere KHayal mein tauhin hai aqidat ki

samundaron mein rahun aur labon pe pyas rahe