Hanuz Zindagi-e-talKH Ka Maza Na Mila

hanuz zindagi-e-talKH ka maza na mila

kamal-e-sabr mila sabr-azma na mila

meri bahaar-e-KHizan jis ke iKHtiyar mein hai

mizaj us dil-e-be-iKHtiyar ka na mila

jawab kya wahi aawaz-e-bazgasht aai

qafas mein nala-e-jaan ka mujhe maza na mila

umid-war-e-rihai qafas-ba-dosh chale

jahan ishaara-e-taufiq ghaebana mila

hawa ke dosh pe jaata hai karwan-e-nafas

adam ki rah mein koi piyaada-pa na mila

hazar hath usi jaanib hai manzil-e-maqsud

dalil-e-rah ka gham kya mila mila na mila

bas ek nuqta-e-farzi ka nam hai kaba

kisi ko markaz-e-tahqiq ka pata na mila

umid-o-bim ne mara mujhe do-rahe par

kahan ke dair o haram ghar ka rasta na mila

KHusha-nasib jise faiz-e-ishq-e-shor-angez

ba-qadr-e-zarf mila zarf se siwa na mila

samajh mein aa gaya jab uzr-e-fitrat-e-majbur

gunahgar-e-azal ko naya bahana mila

ba-juz irada-parasti KHuda ko kya jaane

wo bad-nasib jise baKHt-e-na-rasa na mila

nigah-e-'yas' se sabit hai sai-e-la-hasil

KHuda ka zikr to kya banda-e-KHuda na mila