Kitne Pech-o-tab Mein Zanjir Hona Hai Mujhe

kitne pech-o-tab mein zanjir hona hai mujhe

gard mein gum KHwab ki tabir hona hai mujhe

jis ki tabinda taDap sadiyon mein bhi sinon mein bhi

ek aise lamhe ki tafsir hona hai mujhe

KHasta-dam hote hue diwar-o-dar se kya kahun

kaise KHisht-o-KHak se tamir hona hai mujhe

shahr ke mear se main jo bhi hun jaisa bhi hun

apni hasti se teri tauqir hona hai mujhe

ek zamane ke liye harf-e-ghalat Thahra hun main

ek zamane ka KHat-e-taqdir hona hai mujhe

'yusuf' apne dard ki surat-gari karte hue

KHud bhi lauh-e-KHak par taswir hona hai mujhe