Na GhaT Hai Koi Apna Na Ghar Hamara Hua

na ghaT hai koi apna na ghar hamara hua

qayam ab ke sar-e-rah-guzar hamara hua

gharaz rahi na kabhi manzilon se koi hamein

hamesha apne hi andar safar hamara hua

usi ki raushni kaam aai umr-bhar apne

jo ek sitara faqat sham-bhar hamara hua

hamare hisse mein diwar hi rahi din raat

koi daricha hamara na dar hamara hua

hamare KHun se guzar kar hi tegh-e-barq bujhi

hamare KHas mein utar kar sharar hamara hua

zar-e-suKHan jo luTaya hai raste mein kahin

to dur dasht-e-hawa mein KHatar hamara hua

rahe hain be-samar o saya hi sar-e-hasti

barae nam yahan par shajar hamara hua

isi mein uljhe hue hain hamare panw abhi

jo ek KHwab kabhi sar-ba-sar hamara hua

kisi sanad ki zarurat nahin paDi hai 'zafar'

hamara aib hi aaKHir hunar hamara hua