Kyun Ho Na Gir Ke Kasa-e-tadbir Pash Pash

kyun ho na gir ke kasa-e-tadbir pash pash

hai sang-e-gham se shisha-e-taqdir pash pash

hai KHun-e-be-gunah se jigar resh-e-tegh bhi

jauhar nahin ye hai tan-e-shamshir pash pash

tir-e-nigah ne dil mera ghirbaal kar diya

zaKHmon se ho gaya tan-e-naKHchir pash pash

tegh-e-zaban-e-yar se majruh hai jigar

hota hai dil mera dam-e-taqrir pash pash

ai tegh-e-kalik likh wo mazamin-e-taniya

dil hasidon ke hon dam-e-tahrir pash pash

'zeba' ghazal to tum ne kahi is zamin mein KHub

sabit har ek jagah hai ba-tadbir pash pash