Hamein Kaha Jaega

hamein kaha jaega ki hath upar uTha len

aur apne talai KHwab, nuqrai wade

aur kansi ke phul hamare hawale kar den

apni mahbubaen waldain aur dost

hamare supurd kar den

apni zamin aur aasman girwi rakh den

apne samundar aur sahra

barae nam qimat pe faroKHt kar den

kashtiyon aur jangalon ko aag laga den

dariya aur pul KHali kar den

ghar chhoD ke chale jaen

aur pichhe muD ke na dekhen

mohabbat ek na-munasib qadam hai

is se gurez karen

hamein kaha jaega ki

aainda kuchh na kahen