Sharif-zada

suno kal tumhein hum ne madras cafe mein

aubash logon ke hamrah dekha

wo sab laDkiyan bad-chalan thin jinhen tum

saliqe se kafi ke cup de rahe the

bahut fuhsh aur mubtazil nach tha wo

ki jin ke recordon ki ghaTiya dhunon par

thirakti machalti hui laDkiyon ne

tumhein apni banhon ki jannat mein rakkha

bahut dukh hua

tum ne hotel mein kamre kirae pe le kar

un aubash logon aur un laDkiyon ke hujum-e-tarab mein

gai raat tak jashn-e-sahba manaya

bahut dukh hua KHandani sharafat

buzurgon ki banki sajili wajahat ko

tum ne sar-e-am yun raund Dala

saliqa jo hota tumhein laghzishon ka

to apne buzurgon ki manind tum bhi

gharon mein kanizon se pahlu sajate

be-ishrat dil haweli mein har shab

kabhi raqs hota kabhi jam chalte

saliqa jo hota tumhein laghzishon ka

to yun KHandani sharafat wajahat

na miTTi mein milti na badnam hoti

(651) Peoples Rate This

Your Thoughts and Comments

Sharif-zada In English By Famous Poet Zubair Rizvi. Sharif-zada is written by Zubair Rizvi. Read famous Poem Sharif-zada for youth and Student by Zubair Rizvi. Free Download Sharif-zada in PDF.