Dua Ki Rakh Pe Marmar Ka Itr-dan Us Ka

dua ki rakh pe marmar ka itr-dan us ka

gazidgi ke liye dast-e-mehrban us ka

gahan ke roz wo daghi hui jabin us ki

shab-e-shikast wahi jism be-aman us ka

kamand-e-ghair mein sab asp o gosfand us ke

nasheb-e-KHak mein KHufta-sitara-dan us ka

tannur-e-yaKH mein ThiThurte hain KHwab o KHun us ke

likha hai nam sar-e-lauh-e-raftagan us ka

chuni hui hain tah-e-KHisht ungliyan us ki

khula hua hai pas-e-reg baadban us ka

wo ek charagh hai diwar-e-KHastagi pe ruka

hawa ho tez to har haal mein ziyan us ka

usi se dhup hai ambar-e-dhund hai ru-posh

giraft-e-KHwab se barsar hai karwan us ka