Nakaam Hain Asar Se Duaen Dua Se Hum
nakaam hain asar se duaen dua se hum
majbur hain ki laD nahin sakte KHuda se hum
honge na munharif kabhi ahd-e-wafa se hum
chahenge hashr mein bhi buton ko KHuda se hum
chahoge tum na hum ko na chhuToge hum se tum
majbur tum jafa se hue ho wafa se hum
aata nahin nazar koi pahlu bachao ka
kyunkar bachaen dil tere tir-e-ada se hum
tum se bigaD ishq mein hona ajab nahin
anjam jaante the yahi ibtida se hum
ilzam un ke ishq ka 'ahsan' ghalat nahin
nadim tamam umr rahe is KHata se hum
Ahsan Marahravi 
(756) Peoples Rate This