کام عشق بے سوال آ ہی گیا

کام عشق بے سوال آ ہی گیا

خودبخود اس کو خیال آ ہی گیا

تو نے پھیری لاکھ نرمی سے نظر

دل کے آئینے میں بال آ ہی گیا

دو مری گستاخ نظروں کو سزا

پھر وہ نا گفتہ سوال آ ہی گیا

زندگی سے لڑ نہ پایا جوش دل

رفتہ رفتہ اعتدال آ ہی گیا

حسن کی خلوت میں دراتا ہوا

عشق کی دیکھو مجال آ ہی گیا

غم بھی ہے اک پردۂ اظہار شوق

چھپ کے آنسو میں سوال آ ہی گیا

وہ افق پر آ گیا مہر شباب

زندگی کا ماہ و سال آ ہی گیا

بے خودی میں کہہ چلا تھا راز دل

وہ تو کہئے کچھ خیال آ ہی گیا

ہم نہ کر پائے خطا بزدل ضمیر

لے کے تصویر مآل آ ہی گیا

ابتدائے عشق کو سمجھے تھے کھیل

مرنے جینے کا سوال آ ہی گیا

لاکھ چاہا ہم نہ لیں غم کا اثر

رخ پہ اک رنگ ملال آ ہی گیا

بچ کے جاؤ گے کہاں ملاؔ کوئی

ہاتھ میں لے کر گلال آ ہی گیا