Phunk Denge Mere Andar Ke Ujale Mujhko
phunk denge mere andar ke ujale mujh ko
kash dushman mera qindil bana le mujh ko
ek saya hun main haalat ki diwar mein qaid
koi suraj ki kiran aa ke nikale mujh ko
apni hasti ka kuchh ehsas to ho jae mujhe
aur nahin kuchh to koi mar hi Dale mujh ko
main samundar hun kahin Dub na jaun KHud mein
ab koi mauj kinare pe uchhaale mujh ko
tishnagi meri musallam hai magar jaane kyun
log de dete hain TuTe hue pyale mujh ko
Aziz Bano Darab Wafa 
(820) Peoples Rate This