داروئے درد نہاں راحت جانی صنما

داروئے درد نہاں راحت جانی صنما

عیسیٰٔ مردہ دلاں یوسف ثانی صنما

تیرے صدقے مری جاں تجھ پہ مرا دل قرباں

وارث کون و مکاں فخر زمانی صنما

تیرا ہر جلوہ ہے آئینۂ اسرار ازل

تیری صورت میں ہیں انوار معانی صنما

دل کے داغوں کو کلیجے سے لگا رکھا ہے

کہ یہی داغ تو ہیں تیری نشانی صنما

تو ہی جب قصۂ غم سے مرے گھبراتا ہے

پھر سنے کون مرے غم کی کہانی صنما

تا کجا اشک بجھائیں گے مرے دل کی لگی

پھونکے دیتا ہے مجھے سوز نہانی صنما

وقف سجدہ ہے ترے در پہ جبین بیدمؔ

قبلۂ دل صنما کعبۂ جانی صنما