کہاں ثبات غم دل کہاں سراب سکوں

کہاں ثبات غم دل کہاں سراب سکوں

وہ خوش نصیب ہے مل جائے جس کو سوز دروں

خود آپ دیکھ لیں کیا حال دل زباں سے کہوں

ابھی تو ہیں مری آنکھوں میں چند قطرۂ خوں

یہ شہر ہم نفساں کتنی بار اجڑا ہے

کبھی نہ ہو سکا لیکن سر حیات نگوں

ابھی تو مصلحت وقت ہی پہ نازاں ہے

ابھی خرد کو میسر کہاں مقام جنوں

نگاہ نیچی کئے منفعل سے بیٹھے ہیں

اب ان سے شکوۂ بیداد کس زباں سے کروں

نکھار آ ہی گیا خشک خشک چہروں پر

ملا تو گریۂ شبنم سے کچھ گلوں کو سکوں

دراصل ہے مری ہستی کی کائنات اعجازؔ

وہ اک نگاہ جسے زندگی کا راز کہوں