حد بدن میں میری ذات آ نہیں رہی ہے

حد بدن میں میری ذات آ نہیں رہی ہے

بھاگی ہوئی ہے ایسی ہاتھ آ نہیں رہی ہے

اک ساتھ کر رہا ہوں اتنی بہت سی باتیں

ہونٹھوں پہ کہنے والی بات آ نہیں رہی ہے

سورج مرا پڑا ہے آنکھوں کے راستے میں

دن ڈھل چکا ہے کب کا رات آ نہیں رہی ہے

بازار میں گھرا ہوں اور شور ہو رہا ہے

میری سمجھ میں کوئی بات آ نہیں رہی ہے

دنیا سے بات کر کے بد ذات ہو گیا میں

اب میرے گھر مری ہی ذات آ نہیں رہی ہے

جس رات فرحتؔ احساس اپنی حدوں سے نکلے

وہ ماں کی کوکھ جیسی رات آ نہیں رہی ہے