Maine Har-chand Ki Us Kuche Mein Jaana ChhoDa
main ne har-chand ki us kuche mein jaana chhoDa
par tasawwur mein mere us ne na aana chhoDa
us ne kahne se raqibon ke mujhe chhoD diya
jis ki ulfat mein dila tu ne zamana chhoDa
uTh gaya parda-e-namus mere ishq ka aah
us ne khiDki mein jo chilman ka lagana chhoDa
hath se mere wo pita nahin muddat se sharab
yaro kya apni KHushi main ne pilana chhoDa
tere 'ghamgin' ko pareshani hai us roz se yar
tu ne jis roz se zulfon ka banana chhoDa
Ghamgeen Dehlvi 
(753) Peoples Rate This