MukhDa Wo But Jidhar Karega
mukhDa wo but jidhar karega
banda sajda udhar karega
karna ho jise ki KHana viran
dil mein tere wo ghar karega
wo lutf uThaega safar ka
aap-apne mein jo safar karega
waiz ye suKHan tera kabhi aah
hum mein bhi kuchh asar karega
ai shaiKH tujhe buton se inkar
wallah bahut zarar karega
ho jis ko tamam shab sar-e-sham
kya wasl mein wo sahar karega
'ghamgin' jo baiThe us ke dar par
wo us ko na dar-ba-dar karega
Ghamgeen Dehlvi 
(871) Peoples Rate This