Na Pahunche Hath Jis Ka Zoaf Se Ta-zist Daman Tak

na pahunche hath jis ka zoaf se ta-zist daman tak

suragh-e-KHun ab is ka mar ke jae KHak gardan tak

sar-o-saman se hain ye be-sar-o-samaniyan apni

ki hai josh-e-junun mera gareban-gir daman tak

na ki ghaflat se qadr-e-dil abas ilzam dilbar par

mata-e-KHufta ke jaane ke sau raste hain rahzan tak

ye hila bhi nahin kam maut ke aane ko gar aae

na aae jo ki baalin par wo kya jaega madfan tak

kuchh aisa iKHtilat aapas se uTTha is zamane mein

na qatil aae hai mujh tak na jae maut dushman tak

meri mehnat ka zaea hona hi to ek qayamat hai

ki baad-o-barq aafat mein rahenge mere KHirman tak

wafa ki nazr hai meri hi jaan-e-hasrat-aluda

asar ki qadr hai meri hi aah-e-qafila-zan tak

ghubar-e-dil kisi Dhab se na qatil ka hua sabit

ki saf us ki hawa ki tegh mujh se mere kushtan tak

main apne hausle se aur wo apne jame se bahar

na KHanjar ka use khaTka na yan sarfa hai gardan tak

nahin hota rafu chaak-e-gareban-e-fana hargiz

mangain charKH-e-chaarum se agar isa ki sozan tak

giran-jaani chaman mein bhi nishana ho gai aaKHir

ki bar-e-dosh-e-gulban hai meri shaKH-e-nasheman tak

'qalaq' marta hai aur hota hai matam ka ye hangama

magar rona hai is ka tu na aaya bazm-e-shewan tak