DaraKHt Sukh Gae Ruk Gae Nadi Nale

daraKHt sukh gae ruk gae nadi nale

ye kis nagar ko rawana hue hain ghar wale

kahaniyan jo sunate the ahd-e-rafta ki

nishan wo gardish-e-ayyam ne miTa Dale

main shahr shahr phira hun isi tamanna mein

kisi ko apna kahun koi mujh ko apna le

sada na de kisi mahtab ko andheron mein

laga na de ye zamana zaban par tale

koi kiran hai yahan to koi kiran hai wahan

dil o nigah ne kis darja rog hain pale

hamin pe un ki nazar hai hamin pe un ka karam

ye aur baat yahan aur bhi hain dil wale

kuchh aur tujh pe khulengi haqiqaten 'jalib'

jo ho sake to kisi ka fareb bhi kha le