نہ خم و سبو ہوئے چور ابھی نہ حجاب پیر مغاں اٹھا

نہ خم و سبو ہوئے چور ابھی نہ حجاب پیر مغاں اٹھا

ابھی مست بادہ پرست ہیں ابھی لطف بادہ کہاں اٹھا

جو حضور چیں بہ جبیں ہوئے کہا کس نے شور فغاں اٹھا

رہے خیر برق نگاہ کی کوئی دل جلا نہ دھواں اٹھا

یہ کہے زمانہ جواں ہے تو قدم ایسا مرد جواں اٹھا

جو نہ بار عشق اٹھا سکے تو بلا سے تیغ و سناں اٹھا

یہ کہاں بہار جمال ہے کہ جہاں خزاں نہ زوال ہے

تری بزم ناز سے جو اٹھا وہ حسیں اٹھا وہ جواں اٹھا

جو بڑھے تو جان پہ آ بنے جو گھٹے تو جان پہ آ بنے

جسے دل نصیب سے مل گیا عجب اس کے درد نہاں اٹھا

کسی رہ گزر میں پڑے ہیں ہم عبث آسماں کی ہیں رنجشیں

کوئی لاکھ اٹھائے اٹھیں گے کیا کہیں پاؤں کا بھی نشاں اٹھا

ہے حجاب حسن کا یہ اثر کسی خود پرست کو کیا خبر

جو ازل سے سینہ میں جوش تھا وہی بن کے شور فغاں اٹھا

کسی مے کدہ میں رہا جگرؔ کہ تھا محو خواب میں رات بھر

ہوئیں کیا بشارتیں صبح دم کہ اٹھا تو زمزمہ خواں اٹھا

جو ہوے فرشتوں میں مشورے کرے کون عشق کی راہ طے

کمر اپنی باندھ کے جو اٹھا تو جگرؔ سا مرد جواں اٹھا