Jo Tu Ho Pas To Dekhun Bahaar Aankhon Se

jo tu ho pas to dekhun bahaar aankhon se

wagarna karte hain gul kar-e-KHar aankhon se

kahan hai tu ki mein khinchun hun rah mein teri

bisan-e-naqsh-e-qadam intizar aankhon se

zi-bas ki aatish-e-gham shola-zan hai sine mein

girin hain ashk ki jagah sharar aankhon se

main yaad kar dur-e-dandan-e-yar rota hun

Tapakte hain guhar-e-ab-dar aankhon se

Tuk aa ke dekh tu ai sarw-qad mera ahwal

rawan hai gham mein tere juebar aankhon se

chaDhaun dasta-e-nargis mazar-e-majnun par

jo dekhun aaj main ru-e-nigar aankhon se

chaman mein kal koi tujh sa pari nazar na paDa

agarche dekhe hain ja kar hazar aankhon se

hua hai dida-e-'bedar' gul-fishan jab se

gira hai tab se ye abr-e-bahaar aankhon se