Husn Har Naunihaal Rakhta Hai
husn har naunihaal rakhta hai
koi tujh sa jamal rakhta hai
mujh se ho tere jaur ka shikwa
ye bhala ehtimal rakhta hai
tujh se kuchh apna arz-e-haal kare
dil kab itni majal rakhta hai
mah kya hai ki jis se dun tashbih
husn tu be-zawal rakhta hai
jite-ji us se aashiq-e-mahjur
kab umid-e-visal rakhta hai
tu kahan aur us ka wasl kahan
ye KHayal-e-muhaal rakhta hai
ji mein 'bedar' tere milne ka
aah kya kya KHayal rakhta hai
Meer Mohammadi Bedar 
(266) Peoples Rate This