Is Se Aage To Bas La-makan Rah Gaya
is se aage to bas la-makan rah gaya
ye safar bhi mera raegan rah gaya
ho gae apne jismon se bhi be-niyaz
aur phir bhi koi darmiyan rah gaya
rakh poron se jhaDti gai umr ki
sans ki naliyon mein dhuan rah gaya
ab to rasta batane pe mamur hun
be-hadaf tir tha be-kaman rah gaya
jab palaT hi chale ho ai dida-waro
mujh ko bhi dekhna main kahan rah gaya
miT gaya hun kisi aur ki qabr mein
mera katba kahin be-nishan rah gaya
Anjum Saleemi 
(834) Peoples Rate This