Aashiqi Jaan-faza Bhi Hoti Hai

aashiqi jaan-faza bhi hoti hai

aur sabr-azma bhi hoti hai

ruh hoti hai kaif-parwar bhi

aur dard-ashna bhi hoti hai

husn ko kar na de ye sharminda

ishq se ye KHata bhi hoti hai

ban gai rasm baada-KHwari bhi

ye namaz ab qaza bhi hoti hai

jis ko kahte hain nala-e-barham

saz mein wo sada bhi hoti hai

kya bata do 'majaz' ki duniya

kuchh haqiqat-numa bhi hoti hai