گلزار میں ایک پھول بھی خنداں تو نہیں ہے

گلزار میں ایک پھول بھی خنداں تو نہیں ہے

کچھ اور ہے یہ دور بہاراں تو نہیں ہے

ہے چاک‌ بداماں ہی تو اے لالہ خود سر

گل تیری طرح داغ بداماں تو نہیں ہے

اچھا ہی ہوا ڈوب گیا میرا سفینہ

اب کشمکش ساحل و طوفاں تو نہیں ہے

تقدیر کی بات اور ہے ورنہ دل مضطر

امید کے بر آنے کا امکاں تو نہیں ہے

اس بار گراں کا ہے اٹھانا بہت آساں

غم ہے کسی کم ظرف کا احساں تو نہیں ہے

پامال کرے کیوں کوئی بے درد کہ سبزہ

بیگانہ سہی ننگ گلستاں تو نہیں ہے

قیمت مرے آنسو کی فقط ایک تبسم

شبنم کی طرح یہ کوئی ارزاں تو نہیں ہے

کیوں مجھ پہ نظر ہے تری اے گردش دوراں

ہستی مری دنیا میں نمایاں تو نہیں ہے

کچھ داغ ہیں کچھ زخم ہیں فاضلؔ کے جگر میں

مفلس ہے مگر بے سر و ساماں تو نہیں ہے