جس کو دیکھو شام سویرے بے کل ہے

جس کو دیکھو شام سویرے بے کل ہے

شہر ہمارا آوازوں کا جنگل ہے

دیوانہ ہے اور کسی کا شخص وہی

جس کے پیچھے تو برسوں سے پاگل ہے

پگ پھیرا اک بار ہوا تھا بس اس کا

بستی ساری اس دن سے ہی گھائل ہے

سنجیدہ سا رہنے والا اک پیکر

ہم نے دیکھا ہے ندیا سا چنچل ہے

پیاسی دھرتی دیکھ کے ٹھہرا ہے لیکن

برسے گا کب بھرا ہوا جو بادل ہے

لٹ جانے کا رہتا ہے ڈر آٹھ پہر

یہ بستی ہے یا چمبل کا جنگل ہے

اس یگ میں بھی پریم کی باتیں کرتا ہے

دیوانہ ہے کیفیؔ یا پھر پاگل ہے