تجھ سے امید کیا لگا بیٹھے

تجھ سے امید کیا لگا بیٹھے

اپنا سب کچھ ہی ہم گنوا بیٹھے

سن کے اس نے ہنسی اڑائی ہے

داستاں کس کو ہم سنا بیٹھے

کچھ نہ سوجھا تو اس اندھیرے میں

خود کو چپکے سے ہم جلا بیٹھے

اس کی آواز کا کرشمہ ہے

جادو رگ رگ میں جو جگا بیٹھے

حیرتوں کا ہجوم امڑا ہے

وہ بھی جب پاس میرے آ بیٹھے

وہ جو چاہے تو ایک ہی پل میں

پھول پتھر میں بھی کھلا بیٹھے

کچھ پتہ بھی نہیں چلا ہم کو

آنکھ سے دل میں کب سما بیٹھے