دکھ تو دکھ تھے جو ادھر بہر اماں آ نکلے

دکھ تو دکھ تھے جو ادھر بہر اماں آ نکلے

آپ اس دل کے خرابے میں کہاں آ نکلے

اک ذرا نکلے تو آواز دبا دیں اپنی

کیا کریں چپ کا اگر اس کی زباں آ نکلے

جانے کب قہقہے رونا پڑیں احباب کے ساتھ

جانے اطراف میں کب شہر فغاں آ نکلے

کچھ تو دل جوئی چلے دھوپ نما خواہش کی

دشت میں تذکرۂ ابر رواں آ نکلے

میرے قدموں سے کرے جوں ہی مسافت آغاز

زاد رہ میں سے اسی وقت زیاں آ نکلے

دیکھتے دیکھتے سورج کا لہو شام ہوئی

شب کے آلام تھے جتنے بھی بجاں آ نکلے

اپنے صحرا سے بندھے پیاس کے مارے ہوئے ہم

منتظر ہیں کہ ادھر کوئی کنواں آ نکلے

کیا میں پھر بھی نہ کروں آگ سلگنے کا گماں

جب مری سانس کی نالی میں دھواں آ نکلے

آئینے بیچ کے اب چلتے بنو خاورؔ تم

اس سے پہلے کہ کوئی سنگ گراں آ نکلے