Muddat Se Jism Barf Mein JakDa Hua Sa Hai

muddat se jism barf mein jakDa hua sa hai

mahaul mere sine mein baiTha hua sa hai

kohre mein aankh phuT gai tab KHabar mili

suraj meri talash mein nikla hua sa hai

har aankh mujh pe paDti hai talwar ki tarah

har shaKHs mere KHun mein nahaya hua sa hai

nafrat ke jis pahaD ke niche khaDa hun main

wo sari kaenat pe phaila hua sa hai

ghar mein dhuan bhara hai ki baiThun to dam ghuTe

bahar tamam shahr sulagta hua sa hai

han main ghunudgi ke dhundalke mein hun asir

han mera zehn sadiyon ka jaga hua sa hai