شمیم زلف و گل تر نہیں تو کچھ بھی نہیں

شمیم زلف و گل تر نہیں تو کچھ بھی نہیں

دماغ عشق معطر نہیں تو کچھ بھی نہیں

غم حیات بجا ہے مگر غم جاناں

غم حیات سے بڑھ کر نہیں تو کچھ بھی نہیں

حقیقت غم دوراں کے ساتھ اے ناصح

فریب شیشہ و ساغر نہیں تو کچھ بھی نہیں

رہ وفا میں دل و جاں نثار کر جائیں

اگر یہ اپنا مقدر نہیں تو کچھ بھی نہیں

عذاب درد پہ نازاں ہیں اہل درد مگر

نشاط درد میسر نہیں تو کچھ بھی نہیں

یہ کہہ کے چھوڑ دی راہ خرد مرے دل نے

قدم قدم پہ جو ٹھوکر نہیں تو کچھ بھی نہیں

وہ حرف جس سے ہے منصور و دار کو نسبت

لب جنوں پہ مکرر نہیں تو کچھ بھی نہیں

نسیم بن کے ہم آئے ہیں اس گلستاں میں

کلی کلی جو گل تر نہیں تو کچھ بھی نہیں