بے موسم فٹ بال

ہم نے پہلے ہی روکا تھا

اور امی نے بھی ٹوکا تھا

ایمن اس کیچڑ پانی میں

مت کھیلو فٹ بال

کیسا چھل گیا سارا گال

لیکن تم ہو ایک ہی نٹ کھٹ

پہنے جوتے کرتے کھٹ پٹ

بھاگے اس فٹ بال کو لے کر

سب کی بات کو ٹال

کیسا چھل گیا سارا گال

یہ ٹھہرا برسات کا موسم

آنگن میں کیچڑ ہے کیا کم

پھسلا پاؤں تو سارے کپڑے

ہو گئے خون سے لال

کیسا چھل گیا سارا گال

اس میں ہے اپنی ہی بھلائی

کہنا بڑوں کا مانو بھائی

مرہم لگوا لو اور جا کر

لیٹو اوڑھ کے شال

کیسا چھل گیا سارا گال