Pari-paikar Jo Mujh Wahshi Ka Pairahan Banate Hain

pari-paikar jo mujh wahshi ka pairahan banate hain

gareban chaak kar dete hain be-daman banate hain

junun mein ja-ba-ja hum jo lahu rote hain sahra mein

gulon ke shauq mein virane ko gulshan banate hain

jinhen ishq-e-dili hai wo tumhaara nam japne ko

tahaarat se hamari KHak ki misran banate hain

muraqqa khinchte hain jo tere ganj-e-shahidan ka

tah-e-shamshir har taswir ki gardan banate hain

diya karte ho tum jis tarah se bal zulf-e-pechan ko

musafir ke liye yun phansiyan rahzan banate hain

hasinan-e-chaman par KHatma hai jama-zebi ka

phaTa paDta hai joban jo ye pairahan banate hain

hamesha shefta rakhti hai apni husn-e-qudart ka

KHud us ki ruh ho jate hain jis ka tan banate hain

irada hai jo shamshir-e-do-dam ke munh pe chaDhne ka

tere jaan-baz chaar aaina o joshan banate hain

raha karte hain wo dil mein phira karte hain nazron mein

ata karte hain nur aankhon ko dil raushan banate hain

salah-e-ishq de de kar kiye dete hain KHud rafta

tere shaidai dil se dost ko dushman banate hain

koi chaak-e-jigar bulbul ka gul-chinon se pata hai

nikharne ko gul apne apne pairahan banane hain

gulon ke Dher la la ke chaman se us mein phunkenge

qarib-e-bostan bedad-gar gulKHan banate hain

madad tayar hai naqsha iram ka khinch ke aaya hai

shahid-e-naz par rahm aa gaya madfan banate hain

muraqqa khinchte hain bagh ka jo husn qudrat se

gul-e-shadab ka kya rang kya roghan banate hain

talluq zeb-o-zinat se nahin kuchh KHaksaron ko

'sharaf' miTTi mein rangte hain jo pairahan banate hain