Kabhi Jo KHatm Na Ho Aisi Tazgi De Di
kabhi jo KHatm na ho aisi tazgi de di
teri wafa ne nai mujh ko zindagi de di
hamare pas tha kya aur mata-e-dil ke siwa
tere sawal pe wo bhi KHushi KHushi de di
wo shaKHs kaun tha jis ke KHulus-e-paiham ne
meri hayat ko suraj si raushni de di
ajib baat hai jis ne hayat mangi thi
use to maut mili mujh ko zindagi de di
main apne daur se kis darja sharmsar rahe
ghazab kiya mujhe irfan-o-agahi de di
taDap taDap ke jiye jis ke pyar mein 'afshan'
usi ki yaad mein lo aaj jaan bhi de di
Arjumand Bano Afshan 
(669) Peoples Rate This