Yun Gulshan-e-hasti Ki Mali Ne Bina Dali

yun gulshan-e-hasti ki mali ne bina Dali

phulon se juda kaliyan kaliyon se juda Dali

sar rakh ke hatheli par aur laKHt-e-jigar chun kar

sarkar mein lae hain arbab-e-wafa Dali

ruya kahun main is ko ya muzhda-e-bedari

ghul hai ki naqab us ne chehre se uTha Dali

allah-re tasawwur ki naqqashi o nairangi

jab ban gai ek surat ek shakl miTa Dali

saqi ne sitam Dhaya barsat mein tarsaya

jab fasl-e-bahaar aai dukan uTha Dali

KHun-e-dil-e-ashiq ke us qatre ka kya kahna

duniya-e-wafa jis ne rangin bana Dali

'bedam' tere girya ne tufan uTha Dale

aur nalon ne duniya ki buniyaad hila Dali