Tujhse Yun Yak-bar ToDun Kis Tarah
tujh se yun yak-bar toDun kis tarah
main qadam tere ye chhoDun kis tarah
ghar se babar tu na nikla ta-hanuz
tere dar par sar na phoDun kis tarah
mai se taib tha wa-lekin aaj pi
hath lag jawe to chhoDun kis tarah
aabru-e-abr yan manzur hai
aah main daman nichoDun kis tarah
saf dil kyun-kar karun tujh se bhala
TuTi ulfat phir ke joDun kis tarah
shauq se tu hath ko mere maroD
main tera panja maroDun kis tarah
waqt bosa ke ye 'insha' se kaha
tujh se main phir munh na moDun kis tarah
Insha Allah Khan 'Insha' 
(690) Peoples Rate This