Zamana Hech Hai Uski Nigah Mein Ai Dost

zamana hech hai us ki nigah mein ai dost

jo aa gaya tere gham ki panah mein ai dost

jhalak rahi hai jo chashm-e-siyah mein ai dost

wo mauj-e-nur kahan mehr-o-mah mein ai dost

lahu jo sina-e-dahqan se bund bund gira

chamak raha hai wahi taj-e-shah mein ai dost

sanam-kade mein bhi jis shirk ko aman na mili

farogh par hai wahi KHanqah mein ai dost

sukun-e-dil bhi ajab chiz hai ki us ke tufail

jabin pe nur hai haal-e-tabah mein ai dost

na mujtahid hai na sufi magar tera 'manzur'

aziz-tar hai jahan ki nigah mein ai dost