حکایت دوراںؔ
دبلا پتلا نازک دوراںؔ
شیشہ جیسا نازک دوراںؔ
غم کی کالی رات کا مارا
اپنے ہی جذبات کا مارا
آٹھوں پہر یوں کھویا کھویا
جیسے گہری سوچ میں ڈوبا
کم ہنسنا عادت میں داخل
خاموشی فطرت میں داخل
شمع کی صورت بزم میں جلنا
گاہ بھڑکنا گاہ پگھلنا
ماتھے پر ہر وقت شکن سی
چہرہ پر آزردہ تھکن سی
چہرہ سے محرومی ظاہر
معصومی مظلومی ظاہر
آنکھیں ہر دم امڈی امڈی
پلکیں ہر دم بھیگی بھیگی
کرب آنکھوں میں درد آنکھوں میں
راہ وفا کی گرد آنکھوں میں
سہما سہما شام بلا سے
روٹھا روٹھا اپنے خدا سے
عقل و خرد سے جی کو چرائے
پاگل پن سے باز نہ آئے
جانے دل میں کس کی لگن ہے
روح میں کس کانٹے کی چبھن ہے
یہ ہے اپنا دوراںؔ یارو
الجھا سلجھا دوراںؔ یارو
لیکن یارو یہی مسافر
راہ وفا کا دکھی مسافر
شانوں پر اک بوجھ کو لادے
راہ طلب میں آگے آگے
دل میں اک مضبوط ارادہ
نظروں میں اک روشن جادہ
غم کی لمبی رات پہ بھاری
ظلم کا اور ظلمت کا شکاری
انسانی تہذیب کا قائل
دنیا کی تعمیر پہ مائل
سعی پیہم اس کی تمنا
جگمگ جگمگ اس کا رستہ
اس کی ساری فکر پریشاں
انسانی تنظیم کی خواہاں
نظمیں اس کی جان مقاصد
روح تمدن شان مقاصد
صبح پہ شیدا شام پہ عاشق
اپنے وطن کے نام پہ عاشق
باتیں ریب و ریا سے خالی
ہر نقش کردار مثالی
پیار انساں کا دل میں چھپائے
درد جہاں سینہ میں بسائے
دوراںؔ ہے یا روح دوراںؔ
گریاں گریاں خنداں خنداں
اس کی دنیا اپنی دنیا
اس دنیا میں ساری دنیا
(668) ووٹ وصول ہوئے
Hikayat-e-dauran In Urdu By Famous Poet Owais Ahmad Dauran. Hikayat-e-dauran is written by Owais Ahmad Dauran. Enjoy reading Hikayat-e-dauran Poem on Inspiration for Students, Youth, Girls and Boys by Owais Ahmad Dauran. Free Dowlonad Hikayat-e-dauran by Owais Ahmad Dauran in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends