ہوتی نہیں رسائی برق تپاں کہاں

ہوتی نہیں رسائی برق تپاں کہاں

اے ہم نشیں بنائیے اب آشیاں کہاں

ٹھہرے مثال تیری گل ارغواں کہاں

اے مہ جبیں زمین کہاں آسماں کہاں

چھانا کیا میں خاک دو عالم تمام عمر

اپنی تلاش لے گئی مجھ کو کہاں کہاں

چھٹتا ہجوم غم سے مرا ساتھ کس طرح

جاتا بچھڑ کے مجھ سے مرا کارواں کہاں

محدود جن کی دیر و حرم تک تھی جستجو

ہوتا نصیب ان کو ترا آستاں کہاں

ہر منزل حیات کی حد پار ہو چکی

لے جائے گی اب اور اے عمر رواں کہاں

صیاد نے بھی مجھ کو رہا کر دیا جلیسؔ

قسمت میں اب قفس بھی نہیں آشیاں کہاں