Aah-e-zindan Mein Jo Ki CharKH Pe Aawaz Gai

aah-e-zindan mein jo ki charKH pe aawaz gai

par gae par na meri KHwahish-e-parwaz gai

yaad itna hai mere lab pe fughan aai thi

phir KHuda jaane kahan dil ki ye aawaz gai

main ne anjam se pahle na palaT kar dekha

dur tak sath mere manzil-e-aghaz gai

maut jis rah mein ghabra ke qadam rakhti thi

zindagi apni wahan bhi ba-sad andaz gai

par bhi bazu ke the mazbut azaem puKHta

phir bhi bekar meri koshish-e-parwaz gai

dekhte dekhte KHamosh hua naghma-e-dil

tar jab TuT gae saz ki aawaz gai

ai 'falak' main jo gaya su-e-falak shor hua

mahfil-e-dahr se ek hasti-e-mumtaz gai