Chehre Pe Sare Shahr Ke Gard-e-malal Hai

chehre pe sare shahr ke gard-e-malal hai

jo dil ka haal hai wahi dilli ka haal hai

uljhan ghuTan hiras tapish karb intishaar

wo bhiD hai ke sans bhi lena muhaal hai

aawargi ka haq hai hawaon ko shahr mein

ghar se charagh le ke nikalna muhaal hai

be-chehragi ki bhiD mein gum hai har ek wajud

aaina puchhta hai kahan KHadd-o-KHal hai

jin mein ye wasf ho ki chhupa len har ek dagh

un aainon ki aaj baDi dekh-bhaal hai

parchhaiyan qadon se bhi aage nikal gain

suraj ke Dub jaane ka ab ehtimal hai

kashkol-e-chashm le ke phiro tum na dar-ba-dar

'manzur' qaht-e-jins-e-wafa ka ye sal hai