Hum Pe Sau Zulm-o-sitam Kijiyega

hum pe sau zulm-o-sitam kijiyega

ek milne ko na kam kijiyega

bhagte KHalq se kuchh kaam nahin

qasd hai aap se ram kijiyega

gar yahi zulf o yahi mukhDa hai

ghaarat-e-dair-o-haram kijiyega

gar rahi yunhi gul-fishani-e-ashk

ja-ba-ja rashk-e-iram kijiyega

ji mein hai aaj bajae maktub

yahi bait us ko raqam kijiyega

mehrbani se phir ai banda-nawaz

kahiye kis roz karam kijiyega

nind aawegi na tanha 'bedar'

ta na KHwab us se baham kijiyega