Nazara Karun Kaise Teri Jalwagari Ka

nazara karun kaise teri jalwagari ka

parda abhi hail hai meri be-basari ka

uslub naya ras nahin chaaragari ka

bimar pe aalam hai wahi be-KHabari ka

chaska use uf paD hi gaya dar-ba-dari ka

kya kijiye insan ki is aashufta-sari ka

ye rah-e-mohabbat hai ye kanTon se bhari hai

maqdur nahin sab ko meri ham-safari ka

hamdam na uDa jama-e-aKHlaq ki dhajji

diwanon ko hota hai junun jama-dari ka

dekha hai ki khulte nahin dil ahl-e-duwal ke

bharta nahin munh kasa-e-daryuza-gari ka