ہرما فروڈٹ

اس کو شک تھا

خدا نے دو آدھے جسم عموداً جوڑ کے

اس کو تعمیر کیا ہے

جس میں اک حصہ اپنا اور ایک پرایا ہے

وہ آدھے آدھے دو جسموں کا حاصل ہے

وہ اکثر رات کے کالے چہرے سے ڈر جاتا

تو اپنی ہی گود میں چھپ کر رونے لگتا

خود سے باتیں کرتا

دیواروں سے سر ٹکراتا

اپنی تکمیل کی خاطر

دونوں آدھے جسموں کو

بستر پر تنہا چھوڑ کے

اپنے اصلی حصے کی تلاش میں کھو جاتا

لیکن خالی ہاتھوں کو جب

دوزخ کی جانب لٹکائے واپس آتا

اپنی ہی گردن میں بازو ڈالے

خود سے لپٹ کر سو جاتا