Na Daim Gham Hai Ne Ishrat Kabhi Yun Hai Kabhi Wun Hai

na daim gham hai ne ishrat kabhi yun hai kabhi wun hai

tabaddul yan hai har saat kabhi yun hai kabhi wun hai

gareban-chaak hun gahe uData KHak hun gahe

liye phirti mujhe wahshat kabhi yun hai kabhi wun hai

abhi hain wo mere hamdam abhi ho jaenge dushman

nahin ek waza par sohbat kabhi yun hai kabhi wun hai

jo shakl-e-shisha giryan hun to misl-e-jam KHandan hun

yahi hai yan ki kaifiyyat kabhi yun hai kabhi wun hai

kisi waqt ashk hain jari kisi waqt aah aur zari

gharaz haal-e-gham-e-furqat kabhi yun hai kabhi wun hai

koi din hai bahaar-e-gul phir aaKHir hai KHizan bilkul

chaman hai manzil-e-ibrat kabhi yun hai kabhi wun hai

'zafar' ek baat par daim wo howe kis tarah qaim

jo apni pherta niyat kabhi yun hai kabhi wun hai