Is Tarah Paikar-e-wafa Ho Jaen

is tarah paikar-e-wafa ho jaen

ek duje ka aasra ho jaen

aao mil baiTh kar hansen bolen

nahin malum kab juda ho jaen

dukh kisi ko ho hum taDap uTThen

is qadar dard-ashna ho jaen

KHushk dharti chaTaKH rahi ho jab

bhari barsat ki ghaTa ho jaen

shahar jamid hai log be-awaz

aise mahaul mein sada ho jaen

dushmanon ke liye banen sarsar

doston ke liye saba ho jaen

jo hamein dekhe dekh le KHud ko

sar-ba-sar sath-e-aina ho jaen

aag dil ki agar bhaDak uTThe

ye dhundalke sahar-numa ho jaen

rang-e-alam badal raha hai 'hazin'

nahin malum kya se kya ho jaen