Mere Lahje Mein Mere ZaKHm Ki Gahrai Hai

mere lahje mein mere zaKHm ki gahrai hai

raushni raat ke aangan mein utar aai hai

phir mujhe pyar ke sahil pe Thaharna hoga

phir tere dil ke dhaDakne ki sada aai hai

dar-o-diwar pe kuchh aks utar aate hain

mere ghar mein ajab andaz ki tanhai hai

sirf phulon mein nahin hain tere chehre ke rang

mah-e-nau bhi teri Thahri hui angDai hai

wo saba sab jise aawara kaha karte hain

tere aanchal ki mahak mere liye lai hai

qahqaha-bar raho shola-e-gham se na Daro

warna is shahr-e-hunar mein baDi ruswai hai