Main Hun Aur Silsila-e-ashk-e-rawan Aaj Ki Raat

main hun aur silsila-e-ashk-e-rawan aaj ki raat

zindagi hai hama-tan soz ba-jaan aaj ki raat

dida-e-shauq mein hai raqs-kunan aaj ki raat

gham ki bujhti hui shamon ka dhuan aaj ki raat

apni palkon pe larazte hue taron ki qasam

sab ke honTon pe hai fariyaad-o-fughan aaj ki raat

hain kahan aah wo huran-e-tasawwur jin se

dil tha ghairat-dah-e-gulzar-e-jinan aaj ki raat

samne koi nahin ruh-nawaz-e-dil-o-jaan

zindagani ki tamanna hai garan aaj ki raat

chandni raat ke chehre pe hai kyun gham ka ghubar

dhundli dhundli si hai kyun kahkashan aaj ki raat

wo nahin hain to muqaddar mein hain mere 'manzur'

matam-e-marg-e-tamanna-e-jawan aaj ki raat