Main Gharq Ho Gaya Hun KHud Apne Wajud Mein

main gharq ho gaya hun KHud apne wajud mein

aur KHud ko DhunDhta hun KHud apne wajud mein

aadat si paD gai hai jo tanqis ki mujhe

kiDe nikalta hun KHud apne wajud mein

kuchh is tarah se Dhae hain haalat ne sitam

gum ho ke rah gaya hun KHud apne wajud mein

jaise mere hi jism ka hissa ho tum koi

main tum ko DhunDhta hun KHud apne wajud mein

har naqs dekhta hun KHud apne wajud ka

main ek aaina hun KHud apne wajud mein

qaem hai mujh mein mere taKHayyul ki saltanat

be-taj baadshah hun KHud apne wajud mein

'nayab' inqilab-e-zamana ki hai dalil

badlao dekhta hun KHud apne wajud mein